पृथ्वी राजमार्ग र नारायनागढ़-मुग्लिन सडकखण्ड अनिश्चितकालका लागि बन्द

जिल्ला प्रशासन कार्यालय धादिङले जिल्ला र आसपासका क्षेत्रमा विगत दुई दिनदेखि निरन्तर वर्षा भइरहेको र पृथ्वी राजमार्गका विभिन्न स्थानमा पहिरो गएर सडक अवरुद्ध भएको जनाएको छ ।

लगातार परेको बर्षका कारण कृष्णभीरलगायतका स्थानमा पहिरो गएको छ भने धारापानीसहितका स्थानमा सडक भाँसिएको छ ।

त्यस्तै नारायणगढ मुग्लिन सडक खण्डमा पनि विभिन्न स्थानमा पहिरो गएपछि जिल्ला प्रशासन कार्यालय चितवनले अर्को सूचना नभएसम्मका लागि सडक आवागमन बन्द गरेको छ । 

आगामी केही दिनसम्म भारीदेखि अति भारी वर्षा हुन सक्ने सम्भावना रहेको मौसम विज्ञान विभागले समेत सूचना जारी गरेको छ । थप विपद्जन्य जोखिम उत्पन्न हुन सक्ने अवस्थालाई मध्यनजर गर्दै यात्रु तथा सवारीसाधनको सुरक्षा सुनिश्चित गर्न अर्को सूचना जारी नभएसम्म पृथ्वी राजमार्ग भएर चल्ने सबै सवारीसाधनको आवागमनमा पूर्ण रूपमा रोक लगाइएको हो ।

सम्बन्धित सबैलाई जोखिमयुक्त अवस्थामा यात्रा नगर्न र जारी सूचनाको पालना गर्न आग्रह गरिएको छ ।